Голема полициска акција во Скопје откри сомнежи за сериозни финансиски злоупотреби во приватна очна болница, при што се проценува дека меѓу 3.000 и 4.000 пациенти биле оштетени преку двојна наплата на здравствени услуги.
Според информациите објавени од 4news.mk, штетата врз Фондот за здравствено осигурување се проценува на околу 1,7 милиони евра, додека приватната здравствена установа во периодот од 2022 до 2025 година наводно стекнала противправна имотна корист од околу 4,25 милиони евра.
Во рамките на акцијата се поднесени кривични пријави против 11 лица и една приватна здравствена установа, а осум лица се приведени. Меѓу осомничените е и поранешниот директор на ФЗО, Ден Дончев.
Според сомнежите на истражителите, злоупотребите биле овозможени преку договор склучен во 2020 година, по што со внесување невистинити податоци и изготвување спорни фактури, истите медицински интервенции биле наплаќани и од Фондот и директно од пациентите.
Граѓаните, покрај законската партиципација, наводно плаќале и дополнителни износи за операции кои веќе биле покриени преку здравственото осигурување.
Случајот бил откриен по контроли иницирани во периодот кога со ФЗО раководел Сашо Клековски. Според неговите наводи, кај установата со години биле утврдувани повторливи неправилности, без соодветно санкционирање.
Истрагата опфаќа и сомнежи дека одговорни лица во Фондот ги прикривале неправилностите и не преземале соодветни мерки.
Постапката продолжува, а евентуалната кривична одговорност на осомничените треба да биде утврдена пред надлежните судски органи.
