Овој неделен ден, верниците од православната вера ќе го одбележат Рождеството на Пресвета Богородица – еден од дванаесетте големи христијански празници, посветен на раѓањето на мајката Божја. Празникот, попознат како Мала Богородица, се празнува на 21 септември според грегоријанскиот календар.
Според преданието, Богородица е родена во Назарет од праведните и бездетни родители Јоаким и Ана, како одговор на нивните искрени молитви. Во народната традиција, празникот е длабоко вкоренет како симбол на мајчинството, милоста и надежта.
Пресвета Богородица се смета за заштитничка на мајките и жените што сакаат да добијат пород. Жените често се молеле пред нејзините икони, а во некои краеви дури и жените од други вери ѝ се обраќале за помош во тешки породувања.
Манастирите и црквите низ Македонија посветени на Богородица традиционално се места за собирање на верници и народни собири токму на овој ден. Празникот се одбележува со литургии, молитви и панаѓури, кои во минатото траеле и по неколку дена.
Покрај духовното значење, празникот е проследен и со бројни народни преданија за чудотворни икони, цркви изградени по соништа и сведоштва за натприродна помош од Богородица.
Рождеството на Пресвета Богородица се смета за празник на радоста и надежта – почеток на спасението, бидејќи со нејзиното раѓање започнува исполнувањето на ветувањето за доаѓањето на Спасителот.
