Драматична борба со огнот се води на јужната граница кај село Николиќ, каде пожарот веќе неколку дена не стивнува, менувајќи насоки поради силниот ветер и создавајќи сериозна закана за граничната линија со Грција и околните шуми.
„Овој пожар е меѓу најтешките ова лето“, изјави Стојанче Ангелов од Дирекцијата за заштита и спасување, додавајќи дека поради ветрот и конфигурацијата на теренот, и покрај воздушната поддршка со армиски хеликоптер, гаснењето е исклучително отежнато.
Преку Европскиот механизам за цивилна заштита побарана е помош од Грција, конкретно два авиони „канадер“, додека македонските сили веќе се мобилизирани со два хеликоптери и два ЕР-трактори – од кои еден само што пристигнал во Скопје.
Паралелно со пожарот кај Николиќ, нови огнени жаришта се појавуваат и низ други региони. Во Крива Паланка повторно се разгоре пожар на локација каде неодамна беше изгаснат. Според надлежните, само во изминатите 48 часа се регистрирани над 40 пожари на отворен простор ширум државата.
Службите апелираат на максимална претпазливост и воздржување од какви било активности што можат да предизвикаат пожар, додека пожарникарите, армијата и волонтерите вложуваат натчовечки напори за спречување на катастрофални последици.
Ситуацијата останува алармантна.
