Во Прилеп повторно се повтори добро познатото сценарио со дрвокрадци кои не се двоумат да ризикуваат живот само за да избегаат од законот. Според информациите што ги објави заменик-директорот на ЈП „Национални шуми“, Кире Михаилов, група дрвокрадци намерно се забила со своето возило во службен автомобил на Шумската полиција, обидувајќи се да спречат интервенција и да избегаат со нелегално исеченото дрво.
На самото место веднаш биле приведени две лица, додека по уште две – кои им се добро познати на службите – интензивно се трага. Службениците ја одзеле дрвната маса и возилата користени за транспорт, а сè е предадено во ПШС „Црн Бор“ – Прилеп.
Инцидентот се случил доцна навечер, а увидна екипа на МВР извршила детално фотографирање и документација на штетата и доказите, сè со цел точно да се утврди начинот на кој бил изведен овој опасен чин.
Според Михаилов, станува збор за дрвокрадци кои одамна се водат како рецидивисти и за кои веќе има поднесено повеќе пријави поврзани со незаконска сеча. Тој истакнува дека борбата против дрвокрадството нема да запре и дека институциите нема да дозволат ваквите групи да ја уништуваат националната шумска површина без последици.
