Според календарот на Македонската православна црква, денес се одбележува споменот на Светите дванаесет маченици кои пострадале во времето на царот Диоклецијан, оставајќи силно сведоштво за верата и истрајноста.
Меѓу нив најпознат е свети Памфил, презвитер од Кесарија Палестинска, познат како учен и побожен човек кој посветено го исправал и препишувал текстот на Новиот Завет, за да им го пренесе на верниците во чиста форма. Со него пострадале и ѓаконот Валент, кој одлично го познавал Светото писмо, како и Павле, чесен христијанин кој и претходно бил подложен на страдања за Христа.
Во оваа група биле и петмина браќа од Мисир, кои отворено се изјасниле како христијани и поради тоа биле изведени на суд и убиени. Заедно со нив пострадале и Порфириј, Селевкиј, Теодул и Јулијан, кои со својата вера и храброст оставиле неизбришлива трага во христијанската историја. Сите тие маченички го завршиле својот земен живот во 308 година.
Црквата денес го споменува и свети Марут, епископ во Месопотамија, познат по верата, мудроста и делото со кое ги собрал моштите на многу маченици и ги положил во градот Мартиропол.
Се празнува и преподобниот маченик Роман, едноставен, но длабоко посветен верник, кој од љубов кон Христа доброволно тргнал по патот на страдањето и маченички пострадал во 1694 година.
Овој ден е потсетник на силата на верата, жртвата и духовната истрајност, кои овие светители ги оставиле како пример за сите поколенија.
