Одделот за внатрешна контрола при МВР поднесе кривична пријава против А.Ќ., вработен како самостоен инспектор-главен дежурен во Регионалниот центар за ГР Исток. Тој е осомничен за кривичното дело „Оштетување и неовластено навлегување во компјутерски систем“, казниво по член 251 од Кривичниот законик.
Според истрагата, А.Ќ. со користење на туѓо корисничко име повеќепати неовластено влегувал во компјутерскиот систем за изработка на плати во МВР. Притоа правел измени во евиденцијата на работни часови и внесувал лажни податоци со кои си обезбедувал поголема плата и придонеси, на штета на Министерството.
Со ваквите злоупотреби тој се стекнал со противправна имотна корист, додека МВР било оштетено. Покрај кривичната пријава, против него ќе биде поведена и дисциплинска постапка за кршење на работниот ред. Како мерки му е одземено службеното оружје и е суспендиран од работа до завршување на постапката.
