Цената на електричната енергија во Македонија по 1 јануари 2027 година останува неизвесна, а конечната одлука ќе зависи од пресметките на енергетските компании и Регулаторната комисија за енергетика.
Премиерот Христијан Мицкоски изјави дека Владата вложува напори цената на струјата да остане непроменета до крајот на годинава.
„Се бориме цената на струјата да остане иста и да нема зголемување до крајот на годинава“, изјави Мицкоски.
Според него, енергетските компании веќе ги подготвуваат потребните пресметки, а од АД ЕСМ се очекува тие да бидат завршени до крајот на ноември.
Премиерот посочи дека состојбите на европските енергетски берзи го ограничуваат просторот за евентуално намалување на цените.
Според податоците што ги изнесе Мицкоски, електричната енергија на европските берзи надминала 200 евра за мегават-час, додека природниот гас достигнал 86 евра за мегават-час.
За можната цена од почетокот на следната година не даде конкретна прогноза.
„Од први јануари да почекаме што ќе кажат енергетските компании, па ќе видиме“, порача премиерот, нагласувајќи дека не може однапред да ја предвиди одлуката на Регулаторната комисија.
Мицкоски се осврна и на планираните гасни поврзувања со јужниот и северниот сосед, кои треба да овозможат нови инвестиции во електроцентрали на гас и постепено намалување на зависноста од јагленот.
Според најавите, едното поврзување се очекува да биде пуштено во употреба до средината на 2027 година, а другото да стане целосно функционално до крајот на 2028 година.
Засега нема официјална одлука дали струјата ќе поскапи, ќе поевтини или ќе остане со иста цена од 1 јануари.
