Бидете исклучително внимателни со одредени производи како што се свежото месо, рибата или сирењата, како и со сите производи кои се чуваат и складираат на ладно место, дури и додека се уште неотворени во продавницата.
На нив се развиваат бактерии кои воопшто не ги менуваат вкусот, мирисот или текстурата, а храната е всушност контаминирана и опасна, иако вие не можете да го забележите тоа. Сигурно некогаш сте виделе на декларацијата дека на некоја храна ѝ истекол рокот, но сепак сте ја изеле бидејќи вкусот и мирисот биле непроменети. Експертите за храна предупредуваат дека ова може да биде исклучително опасно. На одредена храна се создаваат бактерии кои не оставаат никакви траги, па може да се отруете од оброк кој имал сосема добар вкус.
Еве кои производи мора да ги фрлите ВЕДНАШ по истекот на рокот:
Свежо сирење
Тврдите сирења, како што се гауда или ементалер, можат да траат подолго во фрижидер бидејќи на нив потешко се создава мувла и потешко се множат бактерии. Откако ќе се отворат, овие сирења можат да траат и до три недели. Ако се појави мувла, можете да ја отстраните и да го изедете остатокот од сирењето. Но, кога станува збор за свежите сирења, тие се многу поподложни на бактерии и мора да се фрлат веднаш штом ќе им истече рокот на траење или кога ќе забележите дека се расипуваат. Општо правило е дека најсвежото сирење и најбрзо се расипува, па можете да сметате дека е безбедно за јадење само една до две недели.
Салата од компири
Салатите со туна, јајца или компири се совршено место за развој на бактерии бидејќи се директно изложени на нив. Ако пред неколку дена сте изеле неколку лажици салата од компири, ја виткате назад во фрижидер и заборавите на неа, пред да го земете следниот залог, знајте дека постојат огромни шанси за сериозно труење со храна.
Свежо месо
На свежото месо најчесто е наведен датумот до кој мора да се продаде. Тоа значи дека мора да го зготвите до тој ден или веднаш да го ставите во замрзнувач. Оваа ознака на трговците им кажува до кога смеат да го држат месото на полиците. Свежото месо може да биде контаминирано со салмонела, ешерихија коли и други бактерии, па затоа е клучно да се подготвува на соодветна висока температура за да се уништат сите опасни микроорганизми.
Мелено месо
Експертите се децидни – меленото месо мора да се изеде или да се замрзне најдоцна два дена по купувањето, без разлика дали станува збор за свинско, говедско, јагнешко или пилешко. Бидејќи месото е мелено, бактериите кои веќе се наоѓале на површината лесно се мешаат низ целата маса, со што драстично се зголемува ризикот од труење.
Сувомеснати производи
Сувомесните производи купувајте ги во количини кои можете брзо да ги потрошите. Саламата од мисиркино месо, на пример, по сечењето може да трае само 3 до 5 дена. Вакумираните пакувања во фрижидер траат подолго, но откако ќе ги отворите, рокот повторно се крати на 3 до 5 дена. Овие производи се подложни на развој на бактеријата Listeria, која специфично се размножува во ладни простории како фрижидерот, што значи дека намирниците не се целосно заштитени само затоа што се на ладно.
Риба
Рибата не е ништо поотпорна на бактерии од месото и мора да се конзумира еден до два дена по купувањето. Во спротивно, потребно е добро да ја завиткате и да ја ставите во замрзнувач, каде што може да стои неколку месеци.
Свежи боровинки и бобичесто овошје
Свежото овошје има краток век на траење. Јагодите можете да ги јадете околу три дена по купувањето, а боровинките до една недела. За какво и да се работи, доколку немате намера веднаш да го изедете, најдобро е да го замрзнете.
Зеленчук во пакување (лисест зеленчук)
Ова се однесува и на веќе измиените и исечкани салати во пакувања. Зелениот зеленчук може да пренесува ешерихија коли, па од безбедносни причини задолжително изедете го пред датумот означен на пакувањето.
Школки
Како и сите морски плодови, така и живите школки мора веднаш да се стават во фрижидер за да се спречи размножување на бактерии. Дагните, остригите и останатите школки мора да се изедат во рок од 5 дена по купувањето, додека јакобските капици (сент јак) мора да се потрошат за три дена. При најмал чуден мирис, веднаш фрлете ги.
Сосови од тегла
Иако изгледа дека купечките сосови во тегла можат да траат вечно, тоа важи само додека се затворени. Откако ќе ги отворите, бактериите можат лесно да навлезат, особено ако користите прибор со кој веќе сте допреле друга храна. Сенфот по отворањето може да трае до една година во фрижидер, сосот од домати околу еден месец, а мајонезот до два месеци. Сепак, доколку забележите каква било промена во бојата или густината, веднаш фрлете го производот.
