Според најновите податоци од Евростат за 2024 година, повеќе од четвртина од жителите на Европската Унија се во финансиска неможност да си дозволат седум дена одмор надвор од својот дом. Оваа статистика буди голема загриженост, особено ако се има предвид колку одморот е важен за менталното и физичкото здравје.
Најтешко им е на граѓаните од Романија, каде неверојатни 58,6% не можат да заминат на годишен одмор, следени од Грција со 46% и Бугарија со 41,4%. Овие бројки ја откриваат вистинската слика за нееднаквоста и економските предизвици што ги чувствуваат луѓето во овие држави.
За споредба, жителите на Луксембург (само 8,9%), Шведска (11,6%) и Холандија (13%) имаат многу поголема финансиска стабилност за краток одмор.
Иако податоците за земјите кандидати за ЕУ не се официјални, последните извештаи од регионот откриваат дури повеќе од половина од македонските граѓани немаат финансии за годишен одмор. Ситуацијата е уште потешка во Албанија, Турција, Црна Гора и Косово, каде процентот на луѓе кои не можат да си дозволат одмор достигнува и до 69,5%.
Оваа ситуација бара итни мерки за подобрување на животниот стандард и поддршка на граѓаните, кои сè повеќе се лишени од основното право на одмор и релаксација.
