Неверојатен случај во Србија: На свадба подарил лажна банкнота од 500 евра и побарал кусур
Препознавањето на фалсификувани пари станува сè посложен предизвик, особено во ситуации кога вниманието е насочено кон сосема други нешта. Таков е случајот со необичен инцидент што неодамна се случил во Србија, каде што гостин на свадба подарил фалсификувана банкнота од 500 евра — и побарал кусур од 300 евра.
Според информациите потврдени од Народната банка на Србија (НБС), станува збор за класичен пример на т.н. „стратегија со кусур“, во која фалсификаторот користи лажни пари за да добие вистински пари во замена.
„Фалсификуваната банкнота најчесто се користи за купување производи или услуги со мала вредност или за враќање долгови. Во еден регистриран случај, лажна банкнота била дадена дури и како подарок на свадба, при што сторителот побарал кусур од 300 евра“, изјавија од НБС за порталот B92.net, пренесува Радио Сараево.
Од банката додаваат дека при оваа стратегија фокусот не е на производот или услугата, туку исклучиво на добивањето валиден готовински кусур. Така, фалсификаторот практично разменува безвреден хартиен документ за вистински пари, без притоа да се изложи на поголем ризик.
НБС повторно апелира до граѓаните да бидат особено внимателни при ракување со поголеми апоени, особено при неформални трансакции или подароци, како што се семејни прослави, свадби или лични договори.
