Климатските промени не влијаат само врз температурите, морињата и екосистемите, туку и врз самото движење на Земјата. Нови научни анализи покажуваат дека поради топењето на поларниот мраз и глечерите, ротацијата на планетата постепено се забавува, што значи дека денот станува сè подолг.
Истражувачи од Австрија и Швајцарија посочуваат дека прераспределбата на водата и масата на Земјата, предизвикана од топењето на мразот, директно влијае врз брзината на вртење на планетата. Процесот се споредува со движење на лизгачка на мраз, која забавува кога ги раширува рацете.
Според пресметките, должината на денот се зголемува за околу 1,33 милисекунди на секои сто години. Иако оваа промена е незабележлива за луѓето во секојдневието, научниците предупредуваат дека може да има сериозно значење за системите што зависат од исклучителна прецизност, како што се навигацијата, сателитите и вселенските мисии.
Студијата се темели на испитување на морски фосили и на модели што ги анализираат историските промени во нивото на морето и должината на денот. Според резултатите, вакви осцилации имало и во минатото, но сегашното забавување е меѓу најизразените во последните милиони години.
Научниците предупредуваат дека ако глобалното затоплување продолжи со исто темпо, влијанието врз ротацијата на Земјата може дополнително да се засили, што уште еднаш покажува колку длабоки се последиците од климатските промени.
