Матја Грдур планира да патува преку Турција и Русија до Кина и Лаос, па преку Алјаска и Канада до Аргентина...
Матја Грдур веќе има пропатено половина свет, а сега тргнува во најголемата авантура досега – обиколка на три континенти со Land Rover, заедно со неговиот најверен сопатник, кучето Мишо.
Неколку дена пред заминувањето, Матја ги собра семејството и пријателите на последен ручек и пиво. И никој не се изненади кога рече дека нема да се врати најмалку три до пет години.
„Со 34 години е полуд од кога било“, вели неговиот пријател Тони Бошњаковиќ. „Мене само помислата дека ќе останам со издувана гума на некое ритче во Кина ми е страшна“.
Оставка, Боливија и живот на патот
Матја одамна ја подготвува оваа авантура. Како економист, некогаш имал сопствен fast food, но вели дека стресот од раководење и постојаната смена на вработени го изгореле.
„Немање сон, анксиозност... Но и внимателно планирање“, вели тој. Го продал и fast food-от и станот, купил кампер и патувал некое време, а потоа го продал и него и вложил во Land Rover.
Претходно патувал низ Перу, Виетнам, Јапонија – земји кои го фасцинирале со природа и култура. Вели дека најважната лекција му е: „98% од луѓето се добри. Како зрачиш – така и привлекуваш.“
Патувачки план: од Исток до Југ
Прво ќе патува преку Турција и Русија, па преку Централна Азија до Кина и Југоисточна Азија. Ќе ја премине и западната обала на САД, Route 66, Канада, Алјаска, Централна Америка, Аргентина... А потоа и Африка – почнувајќи од Јужна Африка.
Во Кина ќе патува со пријател од маало и уште двајца од Белград – бидејќи таму мора да има агенција и водич, што го чини најмалку 2.000 евра.
Мишо – верниот сопатник
Мишо, кучето што го нашол полно со крлежи, ќе патува со него – иако бара многу логистика. Секоја земја бара нови прегледи и документација, што ќе го чини од 100 до 300 евра по држава. Сепак, му помага една организација, а има и 20-ина спонзори.
„Имам внатре кревет, мини кујна, фрижидер, плинска боца, сè што ми треба“, вели Матја. Ќе спие во автомобилот и ќе внимава на трошоците – бидејќи сега му следува живот на патот.
„Сакам некој да се осмели – барем до Тајланд сам“
Матја се надева дека неговата приказна ќе инспирира барем една личност да излезе од комфорната зона и да се впушти во авантура.
„Можеби ќе трае три, можеби пет години. Можеби ќе останам некаде во Африка. Никогаш не се знае“, завршува тој со насмевка.
