Македонскиот актер и шоумен Сашко Коцев сподели емотивна приказна која, како што самиот признава, длабоко го погодила и го натерала да размисли за вистинските вредности во животот.
Гостувајќи во емисијата „Да си кажеме“ кај Горан Петрески на телевизија Телма, Коцев зборуваше на различни теми од приватниот и професионалниот живот, но една случка од Гостивар особено му останала врежана во сеќавањето.
Тој раскажа дека при една средба со дете од Гостивар му поставил едноставно прашање – што за него претставува среќа. Одговорот што го добил бил толку искрен и едноставен што го оставил без зборови.
„Едно дете од Гостивар ме расплака. Мислам дека се викаше Александар. Кога го прашав што е за него среќа, малку размисли и ми одговори: ‘Па, јас сè имам. Имам татко, имам мајка, имам брат. Не ми треба ништо друго’“, раскажа Коцев.
Според него, токму во тој момент сфатил колку често луѓето ја бараат среќата во материјалните работи, а притоа забораваат на најважните нешта што ги имаат покрај себе.
„Неверојатно ме стаписа. Во неговиот одговор немаше ништо материјално. Не зборуваше за пари, играчки или нешто што сака да добие. Само рече дека има мајка, татко и брат и дека тоа му е доволно“, изјави актерот.
Коцев нагласи дека токму таквите искрени детски размислувања често носат најсилни животни лекции и потсетуваат што навистина е важно.
Инаку, актерот и самиот повеќепати има истакнато дека неговата најголема среќа се семејството и најблиските. Тој од 2012 година е во брак со докторката Смиљана Бундовска, а во 2017 година ја добија ќерката Јоана.
Приказната што ја раскажа предизвика силни реакции кај гледачите, бидејќи на едноставен начин ја пренесува пораката дека среќата често не се крие во материјалните работи, туку во луѓето кои ги имаме покрај себе и во љубовта што ја добиваме од нив.
