Доколку сакате вкусен десерт што се подготвува брзо, без печење и без многу трошоци, оваа чоколадна торта е одличен избор. Потребни се само неколку состојки, а подготовката трае околу 10 минути, по што тортата треба да се излади и да се стегне во фрижидер.
Потребни состојки за филот:
- 600 мл млеко
- 100 г шеќер
- 3 лажици какао
- 3 лажици густин
- 100 г путер
- 100 г темно чоколадо
- 400 г бисквити
За чоколадниот прелив:
- 150 г темно чоколадо
- 150 мл слатка павлака
За декорација:
- Сечкани ф'стаци или ореви
Начин на подготовка:
Во тенџере измешајте ги млекото, шеќерот, какаото и густинот. Загревајте со постојано мешање додека не добиете густ и кремаст фил.
Додека смесата е сè уште топла, додајте ги путерот и темното чоколадо. Мешајте додека целосно не се растопат и соединат.
Бисквитите искршете ги на помали парчиња, додајте ги во чоколадниот фил и добро промешајте. Добиената смеса распоредете ја рамномерно во калап за торта.
За преливот, загрејте ја слатката павлака и прелијте ја врз чоколадото. Мешајте додека не добиете мазна чоколадна смеса, а потоа распоредете ја врз тортата.
На крај украсете со сечкани ф'стаци или ореви и оставете ја тортата во фрижидер додека целосно не се стегне.
Резултатот е кремаста, богата чоколадна торта која се подготвува без рерна и е идеална за семејни прослави, родендени или кога ви се јаде нешто слатко.
