Сериозно предупредување доаѓа од Европска Унија, каде се разгледуваат итни мерки поради зголемените тензии на Блискиот Исток и нивното влијание врз енергетските пазари. Според најавите, ситуацијата може да прерасне во долгорочна криза со последици што ќе се чувствуваат во секојдневниот живот.
Енергетските текови се веќе нарушени, особено поради проблемите околу Ормуски теснец, клучна точка за глобалното снабдување со нафта. Ова предизвика нагло зголемување на цените и страв од нестабилност во снабдувањето.
Еврокомесарот за енергија, Ден Јоргенсен, јасно порача дека Европа мора да се подготви за „најлошото сценарио“. Иако моментално нема недостиг на клучни ресурси, се разгледуваат опции како користење на стратешките резерви, па дури и можни ограничувања во потрошувачката доколку состојбата се влоши.
Влијанието веќе се чувствува – цените растат, економиите се под притисок, а некои држави повторно активираат алтернативни извори на енергија за да ја задржат стабилноста. Дополнително, загриженоста расте и кај индустриите што директно зависат од гориво, како авиосообраќајот.
Од Брисел порачуваат дека сите опции се на маса и дека клучно ќе биде навремено реагирање. Иако засега нема конкретни ограничувања, сигналите што доаѓаат се појасни од било кога – Европа влегува во период на неизвесност што може да трае подолго отколку што се очекуваше.
