Најмалку 21 лице го загубило животот во тешка сообраќајна несреќа што се случила во провинцијата Западен Кејп во Јужноафриканската Република, во близина на Кејптаун.
Во несреќата учествувале три возила – две комбиња-такси и уште едно возило, потврдија националната агенција за управување со сообраќајот и локалните власти.
Несреќата се случила синоќа околу 23:30 часот на патот меѓу градовите Принс Алберт и Лиу-Гамка, на околу 380 километри источно од Кејптаун.
Информацијата ја потврди Мунеера Али, портпаролка на покраинскиот оддел за сообраќај „Вестерн Кејп Мобилити“.
Според Државната агенција за управување со патниот сообраќај, првично дошло до директен судир меѓу двете комбиња-такси. По ударот, во нив се забило и третото возило.
Во несреќата има и повеќе повредени, а дел од нив се здобиле со тешки повреди. Надлежните служби продолжуваат со утврдување на сите околности под кои дошло до трагичниот судир.
Комбињата-такси претставуваат еден од најзастапените начини на јавен превоз во Јужноафриканската Република, особено за голем број жители кои секојдневно патуваат меѓу различни населени места.
Сепак, овие возила често се поврзуваат и со тешки сообраќајни несреќи, во кои има голем број жртви.
