Тешка сообраќајна несреќа се случила во текот на ноќта во селото Церовац кај Шабац, во која животот го загубил 25-годишниот Марко С., додека неговиот сопатник се наоѓа во критична состојба.
Несреќата се случила околу еден часот по полноќ. Според првичните информации објавени во српските медиуми, двајцата млади се враќале од свадбена прослава кога, од засега неутврдени причини, автомобилот излетал од коловозот и се превртел.
Возилото при несреќата било тешко оштетено, а на местото веднаш пристигнале екипи на Брзата помош и противпожарната единица од Шабац.
Поради состојбата на автомобилот, пожарникарите морале да интервенираат за да ги извлечат лицата од возилото.
За 25-годишниот Марко, за жал, лекарите не успеале да помогнат и ја констатирале неговата смрт. Според објавените информации, младиот човек пред околу една година станал татко.
Другиот млад човек кој се наоѓал во автомобилот бил тешко повреден. Тој итно бил транспортиран во Ургентниот центар во Белград, каде што лекарите се борат за неговиот живот.
Полицискиот увид на местото на несреќата е завршен. Надлежните продолжуваат со истрагата, која треба да ги утврди точните околности и причините поради кои возилото излетало од патот.
Според досегашните информации, причините за несреќата сè уште не се официјално утврдени.
