Тензиите нагло ескалираа во Багдад, откако американската амбасада стана цел на координиран напад со дронови и ракети. Според извештаите на Reuters и Agence France-Presse, станува збор за еден од најсериозните инциденти во последниот период.
Безбедносни извори од Ирак тврдат дека нападот е најинтензивен досега, особено во контекст на актуелните тензии поврзани со конфликтот меѓу САД, Израел и Иран. Ситуацијата дополнително ја влошува фактот што нападите биле изведени со комбинација од повеќе средства.
Според информации од терен, најмалку три беспилотни летала и четири ракети биле насочени кон амбасадата, при што еден од дроновите паднал директно во рамките на објектот. Деталите за евентуална штета или повредени засега не се целосно објавени.
Интересно е што неколку часа пред нападот, амбасадата издала предупредување до американските граѓани во Ирак, посочувајќи дека милитантни групи поврзани со Иран сè почесто ја напаѓаат т.н. Зелена зона – строго обезбедениот дел од градот каде се наоѓаат владините институции и дипломатските мисии.
Овој напад е само дел од серијата инциденти што ја потресоа земјата изминативе денови. Претходно, дрон предизвика пожар во луксузен хотел во истата зона, што дополнително ја подгрева загриженоста за безбедноста во регионот.
