Две лица од Турција се лишени од слобода во Скопје поради сомнение за обид за убиство, откако во стан во скопската населба Карпош биле нападнати двајца мажи на возраст од 26 години. Полицијата трага по уште едно лице за кое постојат сомневања дека учествувало во нападот.
Како што информираат од Министерството за внатрешни работи, Единицата за насилен криминал при СВР Скопје, односно Одделението за крвни и сексуални деликти, поднела кривична пријава по брза постапка против К. М. (36) и С. Б. П. (22), двајцата државјани на Турција.
Тие се сомничат дека заедно со уште едно лице, исто така од Турција, го извршиле кривичното дело „убиство во обид“, предвидено во член 123 во врска со член 19 од Кривичниот законик.
Двајца мажи повредени со остар предмет
Според полициските информации, осомничените во стан на подрачјето на Карпош физички нападнале двајца 26-годишни мажи од Турција, при што им нанеле повреди со остар предмет. Во моментот на инцидентот во станот се наоѓале и две женски лица.
По нападот, осомничените наводно избегале од местото на настанот.
Полициските службеници презеле мерки за нивно пронаоѓање, по што К. М. и С. Б. П. биле лоцирани и лишени од слобода на улицата „Јадранска магистрала“ во Скопје.
Полицијата трага по третото лице
Од СВР Скопје информираат дека продолжуваат активностите за пронаоѓање на третото лице за кое постои сомнение дека учествувало во нападот.
Против двајцата приведени е поднесена кривична пријава за „убиство во обид“, а случајот продолжува да се расчистува од надлежните органи.
