Македонски државјанин на возраст од 36 години е меѓу тројцата осомничени за необична измама во Белград, во која со помош на специјална картичка бил земен најнов модел на „iPhone 18 Pro Max“, без да биде извршено вистинско плаќање.
Според информациите од Третото основно јавно обвинителство во Белград, покрај Македонецот со иницијали М. М., во случајот се вмешани и 44-годишен маж со иницијали Г. Б. и 28-годишен француски државјанин со иницијали Л. Ј. Т. Б.
Измамата била извршена на 16 октомври во продавница за техничка опрема во Нов Белград, а вредноста на противправно стекнатата корист се проценува на повеќе од 450.000 српски динари, односно околу 3.800 евра.
Според обвинителството, македонскиот државјанин со автомобил го превезол Французинот до продавницата „Гигатрон“, каде што се сретнале со третиот осомничен.
Францускиот државјанин потоа влегол во продавницата и се обидел да купи „iPhone 18 Pro Max“ користејќи картичка која изгледала како обична платежна картичка.
Меѓутоа, според истрагата, станувало збор за специјална картичка која со помош на софтвер ја нарушувала комуникацијата со ПОС-терминалот, создавајќи лажен впечаток дека трансакцијата е успешно извршена.
На тој начин вработените поверувале дека телефонот е платен и му го предале уредот на осомничениот.
По напуштањето на продавницата, Французинот и Македонецот со автомобил се упатиле кон автоцентар, каде што телефонот му бил предаден на третиот осомничен.
Српската полиција ги открила тројцата осомничени, по што биле приведени и сослушани пред јавен обвинител.
Обвинителството ги товари за кривично дело измама во соизвршителство.
По сослушувањето, јавниот обвинител побарал притвор за македонскиот и францускиот државјанин поради опасност од бегство.
Како причина е наведено тоа што двајцата се странски државјани кои немаат пријавено живеалиште или престојувалиште во Србија, а нивните животни и деловни активности се поврзани со други држави.
За барањето за притвор треба да одлучи надлежниот суд.
Истрагата продолжува, а кривичната одговорност на осомничените треба да биде утврдена во понатамошната судска постапка.
