Младиот пејач Дилан Картер (24), кој стана препознатлив по своето учество во популарното американско шоу The Voice, трагично го загуби животот во тешка сообраќајна несреќа.
Несреќата се случила во саботата навечер во округот Колтон, во неговата родна држава Јужна Каролина. Според информациите од локалните медиуми, станува збор за инцидент во кој било вклучено само едно возило, а трагедијата се случила непосредно пред полноќ.
Она што ја прави оваа загуба уште поболна е фактот што младиот пејач имал закажан настап веќе во понеделник, во својот роден град Монкс Корнер – настап што требало да биде уште една можност да ја сподели својата музика со публиката која го поддржуваше.
Дилан Картер ја освои симпатијата на гледачите во 2023 година, кога се појави во 24. сезона на The Voice. Неговата аудиција беше особено емотивна – ја изведе песната I Look to You од Витни Хјустон, посветувајќи ѝ ја на својата мајка, која починала една година претходно.
Со таа изведба успеа да допре до сите четворица членови на жирито – Реба Мекентајер, Најал Хоран, Џон Леџенд и Гвен Стефани – кои без двоумење ги свртеа своите столчиња, препознавајќи го неговиот исклучителен талент и искрената емоција.
Тој на крајот ја избра Реба Мекентајер за своја менторка, а таа по трагичната вест се прости од него со длабоко емотивни зборови.
– Многу ќе ни недостига. Беше брилијантен, љубезен и талентиран млад човек кој внесе сончев зрак во „The Voice“. Почивај во мир, драг пријателе – напиша таа, опишувајќи го не само како уметник, туку и како човек кој оставил силен впечаток кај сите што го познавале.
