Голема тага ја потресе музичката сцена во регионот откако српските медиуми објавија дека починала пејачката Марија Миленковиќ, позната како членка на „Баракуда бенд“. Таа починала на 48-годишна возраст, а веста предизвика бројни реакции и пораки со сочувство од нејзини колеги, пријатели и обожаватели.
Марија починала кон крајот на април, оставајќи зад себе огромна болка кај семејството, блиските и нејзините две деца. Нејзиниот погреб бил одржан на 28 април во Врњачка Бања, каде последна почит ѝ оддале многу луѓе од музичкиот свет и оние што ја познавале.
Со емотивни зборови од неа се простуваа и нејзините пријатели и колеги преку социјалните мрежи.
„Марија, остануваш во сеќавањата како глас, насмевка и добрина што не се заборава. Нека ти е лесна земјата, а на оние што те сакаа нека им остане утеха што те имаа. Збогум Марија“, стои во една од објавите посветени на пејачката.
Марија Миленковиќ беше препознатливо име во музичките кругови, а публиката особено ја памети по нејзината работа со „Баракуда бенд“. Таа зад себе остави и песни кои и денес се слушаат, а меѓу најпознатите е „Ангели во свила“, што ја сними заедно со пејачот Славко Бањац.
Во едно од своите поранешни интервјуа, Славко Бањац зборуваше со многу емоции за нивната соработка и за самата песна.
„Песната ‘Ангели во свила’ беше тука некаде. Марија и јас ја зграбивме и сега сме во цврста прегратка со нашите ангели“, изјавил тогаш тој.
И самата Марија тогаш не ја криела гордоста за музичката соработка која, како што кажала, долго време ја очекувала.
„Ова е пригода што долго време се чека. Горда сум на оваа соработка, ова сум вистинската јас“, изјавила пејачката.
Нејзината смрт остави голема празнина кај оние што ја сакаа и почитуваа, а многумина ќе ја паметат по нејзиниот препознатлив глас, искрената насмевка и музиката што ја остави зад себе.
