Светот на филмот и телевизијата остана без уште едно познато име. Ирската актерка Слејн Кели, која стекна голема популарност со својата улога во хит-серијата „Тјудори“, почина на 44-годишна возраст по долга и тешка битка со тешка болест.
Актерката, родена во 1982 година во Даблин, починала во саботата во својот дом, опкружена со најблиските членови на семејството. Веста за нејзината смрт ја потврди нејзиниот близок пријател Педи Кортни, кој преку емотивна објава на социјалните мрежи откри дека животот го загубила по борба со рак.
Нејзината смрт остави голема празнина кај семејството и пријателите. Зад себе ги остави родителите Мерион и Џо, братот Дара, снаата Мегс, внуката Елиза, како и својот 11-годишен син Нокс, кој беше нејзино единствено дете.
Љубителите на телевизиските серии најмногу ќе ја паметат по улогата на Џејн Хауард во популарната серија „Тјудори“, каде што настапуваше заедно со познатиот актер Џонатан Рис Мајерс. Освен тоа, Слејн Кели беше препознатливо лице и од рекламната кампања на компанијата „Barry’s Tea“, со која стекна дополнителна популарност.
Покрај успешната актерска кариера, таа беше активна и како филмска продуцентка. Учествуваше во реализацијата на романтичниот филм „The O’Brien’s“ од 2013 година, во кој покрај продукцијата имаше и една од главните актерски улоги.
Нејзиниот живот, сепак, не се сведуваше само на филмот. Таа беше позната и по својата посветеност кон животните и хуманитарната работа. Од таа љубов произлезе и основањето на градската фарма „St Anne’s City Farm“, која и денес функционира како место за едукација, работа и грижа за животните, оставајќи траен белег од нејзината посветеност кон заедницата.
Во официјалното соопштение за нејзината смрт, семејството истакна дека Слејн Кели ќе им недостасува неизмерно на сите што ја познавале и сакале. Нејзиниот талент, хуманост и ведар дух ќе останат запаметени кај бројните колеги, пријатели и обожаватели ширум светот.
