Трагедијата од кочанската дискотека „Пулс“ денес повторно ја потресе јавноста во судницата во затворот „Идризово“, каде беа презентирани шокантните обдукциски наоди за 63 жртви кои го загубија животот во пожарот.
Рочиштето беше исполнето со тензија, солзи и болка, откако одбраната на првообвинетиот Дејан Јованов, познат како Газда Деко, побара тој да биде пуштен во куќен притвор поради наводни здравствени проблеми. Ваквото барање предизвика вистински револт кај родителите на загинатите деца, кои со гласно негодување и гнев реагираа на можноста сопственикот на објектот да добие поблаги мерки. Додека обвинителството децидно се спротивстави на ваквите барања за Јованов и останатите обвинети, судењето премина во својата најтешка фаза со читање на медицинските докази кои го опишуваат ужасот во ноќта на 16 март.
Извештаите од Судска медицина потврдија дека најголем дел од жртвите, дури 50 лица, починале од насилна смрт предизвикана од труење со јаглерод моноксид, додека останатите настрадале од страшно гмечење на градниот кош во стампедото, недостаток на кислород или тешки изгореници од трет степен. Во судницата поединечно се читаа имињата на сите загинати, проследени со офкања и плач на нивните најблиски кои не можеа да го издржат притисокот од морничавите детали. Покрај смртните случаи, беа презентирани и повредите на преживеаните, кои вклучуваат тешки оштетувања на дишните патишта, скршеници и трајни деформитети кај 137 полнолетни лица и 20 малолетници.
Додека одбраната се обидува да ги релативизира доказите и да побара заштита од притисокот на јавноста, семејствата се соочуваат со долг и мачен процес за кој правните застапници предупредуваат дека може да трае со години.
Правдата за најголемата трагедија во поновата историја на Македонија останува во рацете на судот, додека секој нов доказ само ја продлабочува раната кај оние кои ги загубија своите најмили.
