Турскиот претседател Реџеп Таип Ердоган најави војна против неконтролираното поседување оружје по серијата крвави настани кои ја завија земјата во црно. Шокантните пукања во образовните институции минатата недела беа „капката која ја прели чашата“, принудувајќи ја власта на итни и радикални мерки.
Јавноста во Турција сè уште е во неверување по бруталниот напад во покраината Кахраманмараш, каде животот го загубија осум ученици и еден наставник. Во земја каде училишното насилство со огнено оружје е екстремна реткост, овој настан беше аларм дека безбедноста на најмладите е сериозно загрозена.
Ердоган порача дека правилата за поседување пиштоли и пушки ќе бидат екстремно заострени. Најголемата новина се огромните затворски казни за родителите чии деца ќе успеат да дојдат до семејното оружје. Повеќе нема да има изговори – секој сопственик ќе одговара кривично доколку неговиот пиштол заврши во рацете на малолетник.
„Нема да дозволиме домовите да станат арсенали, а училиштата боишта,“ дециден е турскиот лидер.
Покрај физичкото оружје, Ердоган го впери прстот и кон дигиталниот свет. Како дел од новиот безбедносен пакет, владата ќе воведе строг надзор на интернетот за да се спречи радикализацијата и ширењето на насилна содржина која ги инспирира напаѓачите.
Ова е почеток на една од најголемите безбедносни реформи во поновата историја на Турција. Дали овие челични мерки ќе бидат доволни да ги вратат мирот и сигурноста во училишните клупи? Светот со внимание следи дали Турција ќе успее да го сопре бранот насилство пред да стане секојдневие.
