Денешното рочиште за трагичниот пожар во дискотеката „Пулс“ се претвори во вистински хорор. Првообвинетиот Дејан Јованов – Деко, сопственикот на објектот, бил донесен во судот директно од болница, во состојба која ја шокираше присутната јавност.
Адвокатката на обвинетиот, Ивана Коцевска, пред судијката откри застрашувачки детали за неговата состојба. Јованов неодамна преживеал две тешки операции на `рбетот, но наместо во стерилни болнички услови, тој закрепнувал во затворот во Куманово. Таму, според одбраната, тој бил третиран „импровизирачки“ од нестручни лица, што довело до појава на огромен гноен оток.
„Неговата рана е сè уште отворена и не е сошиена за да може да се чисти гнојната содржина. Тој е подложен на нови инфекции секоја секунда,“ истакна Коцевска.
За време на паузата, состојбата на Деко нагло се влошила, по што во судницата во Идризово интервенирала екипа на Брзата помош. Иако лекарите го советувале да земе храна и вода, тој во видлив афект и болка ги одбил. Сепак, медицинскиот тим дал „зелено светло“ дека тој е способен да продолжи со следење на рочиштето, иако едвај стоел на нозе.
Одбраната поднесе итно барање за замена на затворскиот притвор со куќен, тврдејќи дека во затворските услови неговиот живот е загрозен.
- Судијката Дијана Груевска Илиевски ја води постапката под голем притисок.
- Обвинителството сè уште тактизира и најави дека по разгледување на документацијата ќе одлучи дали ќе се согласи Деко да си оди дома.
Дали здравствената драма на првообвинетиот ќе го одложи процесот за „Пулс“ или правдата ќе продолжи да се бара низ болки и итни медицински интервенции? Сè зависи од одлуката која судот мора да ја донесе до крајот на денот!
