Дванаесет возачи биле лишени од слобода во текот на изминатото деноноќие на различни локации низ државата, поради сомнение за сторено кривично дело „Безобѕирно управување со моторно возило“, предвидено во член 297-а од Кривичниот законик.
Според информациите од полицијата, десетмина од приведените управувале моторно возило без да имаат положено возачки испит.
Станува збор за Д.Г. (20), К.Д. (23), И.Ш. (28) и С.Т. (20) од Скопје, Р.Ш. (22) од селото Морани, скопско, А.В. (20) од селото Радишани, скопско, Љ.М. (59) од селото Ресава, кавадаречко, Н.Ј. (35) од селото Слупчане, Општина Липково, како и А.А. (18) од Прилеп и Д.К. (18) од селото Тополчани, прилепско.
Преостанатите двајца возачи, Д.Ќ. (47) од Велес и М.Б. (30) од Крушево, биле затекнати како управуваат возило и покрај тоа што имале активна мерка забрана за управување.
По целосното документирање на случаите, против сите лица ќе бидат поднесени соодветни кривични пријави.
Од полицијата упатуваат апел до сите учесници во сообраќајот да ги почитуваат правилата и прописите, да не седнуваат зад волан без положен возачки испит или додека им трае забраната за управување, како и да не управуваат возило под дејство на алкохол.
Почитувањето на сообраќајните правила е заедничка одговорност и важен чекор кон побезбеден сообраќај за сите.
