Разорниот шумски пожар што беснее југозападно од Осло продолжува да предизвикува огромни штети, а норвешките власти предупредуваат дека интервенцијата би можела да трае уште десетина дена.
Полицијата и противпожарните служби апелираа жителите да не се враќаат во домовите кои останале зачувани, бидејќи опасноста сè уште не е целосно отстранета. Според командантот на полициските операции Столе Фуглас, имало граѓани кои се обиделе да ги пробијат полициските кордони за да стигнат до своите домови.
Пожарникарите и понатаму интервенираат во населбата Крокстаделва во Драмен и околните шумски предели. Во текот на ноќта биле изгаснати повеќе помали пожари, но надлежните предупредуваат дека огнената стихија сè уште не е целосно ставена под контрола.
Според локалните медиуми, 109 куќи се целосно уништени, а уште неколку се сериозно оштетени. Околу 400 жители биле евакуирани од погоденото подрачје.
Норвешката Дирекција за цивилна заштита го оцени овој пожар како еден од најтешките во поновата историја на земјата. Причината за избувнувањето сè уште се утврдува, а властите сметаат дека високите температури, сушата, силниот ветер и густо изградената населба придонеле огнот да се прошири со огромна брзина. Дополнително, се разгледува и можноста боци со гас складирани во домовите да го засилиле интензитетот на пожарот.
