Страшна трагедија го потресе регионот откако двајца 15-годишни тинејџери се удавија во реката Јужна Морава, додека нивен школски другар за влакно избегнал иста судбина.
Според најновите информации, тројцата другари од ист клас дошле на реката со намера да ловат риба. Во еден момент, двајца од нив почнале да го убедуваат третиот да влезе во водата и да плива.
Момчето одбило и решило да си замине дома, оставајќи ги своите работи на брегот. Токму таа одлука, како што се покажало подоцна, му го спасила животот.
Околу два часа подоцна, загрижен што неговите другари не се јавуваат и не се враќаат, повторно дошол на местото. Таму затекнал морничава сцена – на брегот биле само нивните работи и риболовната опрема, додека од момчињата немало никаква трага.
Исплашениот тинејџер веднаш ги повикал своите родители, по што била известена полицијата и започнала потрага.
Во акцијата се вклучиле полицајци, спасувачи и локални жители. За жал, потрагата завршила трагично. Телото на едно од момчињата било пронајдено во реката, додека потрагата по второто продолжила.
Според првичните претпоставки, момчињата биле повлечени од силна речна струја кратко по влегувањето во водата.
Трагедијата остави во шок и тага цела заедница, а надлежните служби продолжуваат со истрагата за сите околности поврзани со несреќата.
