Осомничен за учество во меѓународна криминална мрежа поврзана со шверц на околу 50 тони кокаин користел македонски пасош издаден на туѓ идентитет, објавија медиуми повикувајќи се на информации од истрагата.
Според достапните информации, патната исправа била добиена со злоупотреба на идентитет, што му овозможило полесно да се движи и да го прикрие својот вистински идентитет за време на криминалните активности.
Случајот е дел од поширока меѓународна истрага во која учествуваат повеќе европски и светски безбедносни служби, насочена кон разбивање на организирани криминални групи вмешани во трговија со големи количини наркотични средства.
Истражните органи проверуваат како било овозможено издавањето на македонскиот пасош и дали зад тоа стои организирана мрежа која обезбедувала документи со лажни или украдени идентитети.
Овој случај повторно го актуализира прашањето за незаконски издадените македонски патни исправи на странски државјани, афера која и во минатото беше предмет на домашни и меѓународни истраги поради можни злоупотреби од лица поврзани со организиран криминал.
Надлежните институции засега не откриваат повеќе детали поради тековната истрага, но посочуваат дека проверките продолжуваат со цел да се утврди одговорноста на сите лица кои евентуално биле вклучени во издавањето на спорната патна исправа.
