Директорот на Фондот за здравствено осигурување, Сашо Клековски, денеска соопшти дека тројца од повредените во големиот пожар во кочанската дискотека сè уште се на болничко лекување, а двајца од нив се во тешка, но стабилна состојба и не се во животна опасност.
Тој ова го изјави по увидот во градежните активности на новото физикално одделение во кочанската општа болница. Според него, бројот на пациентите кои имаат потреба од активен болнички третман значително се намалил. Неколкумина веќе се пуштени на домашно лекување, додека дел повремено одат на контроли во странство, главно во болницата во Софија.
Клековски потврди дека еден од повредените кој бил на лекување во Турција се вратил дома, еден е пуштен од пластична хирургија во Скопје, а двајца се згрижени во приватната болница „Систина“. Кај пациенти со потешки изгореници и отворени рани се планирани дополнителни интервенции во Кочани.
Фондот за здравствено осигурување ги покрива трошоците за контролите на шест пациенти кои повремено имаат потреба од прегледи во Софија. Дополнително, во Македонија пристигнал пластичен хирург од Белгија кој извршил преглед на 18 пациенти со изгореници на лицето, вратот и рацете, на кои им претстои подолг третман.
Пожарот што се случи на 16 март во дискотеката „Пулс“ во Кочани однесе 62 човечки животи, а околу 200 лица беа повредени, што го прави еден од најтрагичните настани во поновата историја на земјата.
