Претседателот на Србија, Александар Вучиќ, изјави дека очекува „феноменални политички вести“ во наредните 24 часа, по, како што рече, интензивни и важни разговори поврзани со српската нафтена индустрија.
Вучиќ соопшти дека разговарал со претставници на администрацијата во Соединети Американски Држави, со OFAC и Стејт департмент, како и со унгарскиот премиер Виктор Орбан. Темата, според најавите, е решавањето на ситуацијата околу Нафтена индустрија на Србија (НИС) и санкциите што ја оптоваруваат компанијата.
„Драги граѓани, среќна Нова година. Во следните 24 часа верувам дека ќе се радуваме на феноменални политички вести. Работевме напорно и го заслуживме тоа. Да живее Србија“, изјави Вучиќ во новогодишната порака, пренесе Н1.
Подетални информации за тоа што овие разговори значат за Србија и за иднината на НИС се очекуваат утре, според РТС. Во меѓувреме, како можни купувачи на рускиот удел во НИС јавно беа споменати унгарската компанија MOL и ADNOC.
Санкциите против НИС формално стапија на сила на 10 јануари, кога OFAC ја додаде компанијата на листата СДН. Нивното спроведување досега беше одложувано осум пати, а последната привремена лиценца истече на 8 октомври 2025 година. Во моментов се работи на обезбедување нова лиценца што би овозможила непречено работење на НИС додека не биде целосно отстранета од санкциската листа.
НИС е во мнозинска руска сопственост – Газпромнефт поседува 44,85 проценти, државата Србија 29,87 проценти, додека „ЈСК Интелиџенс“, исто така поврзана со групацијата Газпром, има удел од 11,3 проценти.
Најавата на Вучиќ ја зголеми јавната неизвесност и очекувањата, а исходот од разговорите би можел значително да влијае врз енергетската и економската стабилност на Србија.
