Голем пожар избувна рано утрово во трговскиот центар „Ењуб“ во населбата Нов Белград, предизвикувајќи загриженост кај жителите и масовна интервенција на противпожарните служби.
Според информациите објавени од српските медиуми, веднаш по пријавата на местото биле испратени бројни противпожарни екипи кои започнале акција за локализирање на огнената стихија и спречување на нејзиното понатамошно ширење.
Неофицијалните информации укажуваат дека пожарот зафатил повеќе локали во трговскиот центар, како и дел од покривната конструкција на објектот. Поради опасноста од ширење на огнот, на терен биле ангажирани околу 40 пожарникари со десет противпожарни возила и цистерни.
Во текот на интервенцијата, густ црн чад се издигнувал над објектот и бил видлив од повеќе делови на Белград, што предизвикало внимание и кај граѓаните кои се наоѓале далеку од местото на настанот.
Како мерка на претпазливост, жителите на околните згради биле предупредени да ги затворат прозорците и да избегнуваат непотребно изложување на чадот додека трае интервенцијата.
Засега нема официјални информации за повредени лица, а надлежните служби продолжуваат со активностите на терен. Причините за избувнувањето на пожарот сè уште не се познати и ќе бидат предмет на дополнителна истрага по целосното локализирање на огнот.
