На хрватскиот остров Вис, во неделата околу 22:30 часот, избувна голем пожар на отворен простор. Огнената стихија зафати борова шума и ниска вегетација на подрачјето на Комижа, долж патот кон Подхумље, пренесува страницата „Ватрогасци 193“.
На терен веднаш беа упатени сите расположливи противпожарни сили од оперативното подрачје на островот.
Мобилизирани сите сили на островот
Во гаснењето на пожарот во моментов се вклучени две доброволни противпожарни друштва:
- ДВД Комижа: учествува со 9 противпожарни возила и 35 пожарникари.
- ДВД Вис: на терен излезе со 6 возила и 35 пожарникари.
На лице место се ангажирани вкупно 15 возила и 70 пожарникари, но гаснењето е исклучително тешко. Иако во текот на ноќта немало силен ветер, огнот брзо се ширел во првите часови поради екстремно сувата почва и вегетација.
Четири канадери вклучени во акцијата
Од понеделникот наутро, во 5:40 часот, во битката со огнот се вклучија и воздухопловните сили. Три канадери веќе дејствуваат на теренот, додека четврти авион е на пат кон локацијата.
„Пожарот сè уште е активен, но во овој момент нема загрозени објекти или човечки животи“, изјави противпожарниот командант Иван Ковачевиќ.
Пристигнува засилување од копното
Поради сериозноста на ситуацијата, кон островот Вис е испратена дополнителна помош од копното со првиот траект од Сплит. Според планот, на островските сили ќе им се приклучат уште 8 возила и 34 пожарникари за да помогнат во целосното локализирање на пожарот.
