Сума од 5.300 лева (околу 2.650 евра) собраа учениците од бугарското село Ивањане со велигденски хуманитарен базар за настраданите во трагедијата во Кочани, продавајќи рачно изработени сувенири, слатки и цртежи.
„Ги учиме децата да бидат пред сè добри луѓе – да веруваат во добрината, да се стремат кон неа и да ја создаваат!“, изјави Марија Иванова, директорка на училиштето „Цар Симеон Велики“ од селото оддалечено 12 километри од Софија.
Училишниот тим сподели дека децата биле длабоко трогнати од трагедијата во Кочани и побарале да се смени првичната цел на базарот за да можат да им помогнат на настраданите и нивните семејства и да ја покажат својата солидарност.
Раководството на училиштето наскоро ќе соопшти детали како точно ќе се трошат собраните средства, објавија бугарските медиуми.
