Црногорската полиција уапси 39-годишен маж идентификуван како Амир Барати, за кого американските власти тврдат дека е припадник на Иранската револуционерна гарда и е вмешан во сериозни сајбер напади што, според обвинението, предизвикале штета од околу 3,4 милијарди долари на американската инфраструктура.
Според соопштението на црногорската полиција, апсењето било извршено на територијата на општина Котор, по директно барање од надлежните органи на Соединетите Американски Држави и во координација со Федералното истражно биро (ФБИ). Во акцијата учествувале службеници од Секторот за борба против криминалот, Националното централно биро Интерпол – Подгорица, тимот ФАСТ за меѓународни потраги, како и припадници на Одделението за безбедност Котор.
Властите наведуваат дека уапсениот поседува турско и иранско државјанство и бил означен како високопрофилна цел во истраги поврзани со сајбер криминал и организиран криминал. Според американските обвинители, неговото приведување е дел од постапката за обезбедување на неговото присуство пред правосудните органи во Соединетите Американски Држави.
Против него се води кривична постапка пред Високиот суд во Њујорк, каде што се соочува со повеќе обвиненија поврзани со наводни хакерски активности. Американските власти го сомничат дека учествувал во сајбер напади насочени кон критична инфраструктура, при што, според обвинението, била предизвикана огромна финансиска штета.
По апсењето, ќе следува законската процедура во согласност со меѓународните договори и домашното законодавство, по што ќе се одлучува за понатамошните чекори во постапката, вклучително и евентуалната екстрадиција во Соединетите Американски Држави, каде што треба да се соочи со обвиненијата што му се ставаат на товар.
