Легендарниот американски музичар Били Џоел (77) ги загрижи своите обожаватели откако откри дека поради сериозна здравствена состојба повеќе не смее да вози ниту да настапува на концерти.
Во интервју за „Холивуд репортер“, авторот на познатиот хит „Uptown Girl“ откри дека му бил дијагностициран хидроцефалус со нормален притисок (NPH), невролошко нарушување поврзано со натрупување течност во мозочните комори.
„Не смеам да возам“, изјавил музичарот, додавајќи дека го очекуваат дополнителни медицински испитувања пред да дознае дали некогаш повторно ќе може да се врати на сцената.
Поради здравствените ограничувања, Џоел одлучил да продаде повеќе од 70 мотоцикли од својата колекција.
„Обожавам мотоцикли и возење. Никогаш не бев само колекционер, навистина уживав да ги возам. Но, дојде време да се збогувам со нив“, признал тој.
Музичарот открил дека неговиот невролог го предупредил оти концертните настапи дополнително го оптоваруваат неговиот мозок.
„Секој настап за мојот мозок е како нов потрес на мозокот“, објаснил Џоел, пренесувајќи го предупредувањето од лекарот.
Како особено проблематични ги посочил силниот звук, сценското осветлување, стресот и големата енергија за време на концертите.
Иако неговата здравствена состојба засега не му дозволува да настапува, Џоел не ја исклучува можноста за враќање на сцената, но конечната одлука ќе зависи од резултатите на претстојните медицински прегледи.
