Судска пресуда за бизнисменот и спортски функционер
Турскиот милијардер Садетин Саран, познат бизнисмен и поранешен партнер на пејачката Емина Јаховиќ, е осуден на две и пол години затвор, пренесуваат турските медиуми.
Пресудата доаѓа по истрага поврзана со рекламирање нелегални обложувалници преку платформата „Ес Спорт“, која функционира во рамки на неговата компанија.
Истрагата започнала по акција против нелегално обложување
Според информациите, турскиот суд утврдил вина откако било констатирано дека на спортската платформа биле емитувани реклами поврзани со нелегално обложување.
Случајот произлегол од поширока истрага што минатата есен ја започнала Турската фудбалска федерација за нелегални обложувалници и нивното влијание врз домашниот фудбал.
Случајот предизвика реакции во Турција
Пресудата отвори широка дебата во турската јавност и на социјалните мрежи, каде дел од јавните личности застанале во одбрана на Саран и го довеле во прашање неговото директно учество и одговорност.
Врската со Емина Јаховиќ повторно во фокус
Името на Саран повторно се најде во медиумите и поради неговата поранешна врска со пејачката Емина Јаховиќ, со која беше во романса по нејзиниот развод од Мустафа Сандал.
Таа претходно изјавуваше дека разделбата била мирна и дека останале во добри односи, иако нивната врска траела кратко.
Активен и покрај пресудата
И покрај судскиот процес, турскиот милијардер останува активен на социјалните мрежи, каде редовно објавува фотографии од патувања, деловни активности и спортски тренинзи.
