Музичарот Никола Враниќ, попознат под уметничкото име J. R. August, доживеал сообраќајна несреќа откако паднал од мотор, по што бил пренесен во Итна помош за лекарска грижа и дополнителни прегледи.
Информацијата за несреќата самиот ја сподели преку својот Фејсбук профил, каде објави фотографија од болница и упати благодарност до луѓето кои му помогнале веднаш по инцидентот.
„Благодарам на сите што вчера застанаа и ме прашаа дали сум добро, ми дадоа вода, ми држеа чадор кога почна дождот и го тргнаа моторот од патот. Сè ми е во магла, но смирувачки е да се знае дека животот во вистинскиот свет е многу подобар од овој онлајн, дури и кога станува збор за пад од мотор“, напиша пејачот во својата објава.
Неговата порака брзо привлече внимание и предизвика бројни реакции, особено поради благодарноста што ја упати до непознатите луѓе кои застанале да помогнат во тешкиот момент.
Во моментов не се соопштени повеќе детали околу неговата здравствена состојба, но според информациите што ги сподели самиот, тој е згрижен и се опоравува по несреќата. Обожавателите и пријателите во меѓувреме му испраќаат пораки за побрзо закрепнување.
