Патничка која паднала од крузер во морето, на десетици наутички милји од брегот на Пелопонез во Грција, била пронајдена жива и спасена по речиси еден ден поминат во водата. Информацијата ја потврдија надлежните власти во неделата.
Според соопштението на грчката крајбрежна стража, станува збор за 44-годишна жена од Ел Салвадор, која била забележана во раните утрински часови во саботата. Екипажот на товарен брод, вклучен во големата операција за пребарување и спасување, го забележал трепкавото светло на спасувачкиот појас што го носела жената.
Таа била пронајдена во Јонското Море, на околу 70 наутички милји југозападно од островот Закинтос.
Засега не се познати околностите под кои жената паднала од крузерот, ниту како дошла до спасувачкиот појас што ѝ помогнал да остане забележлива среде морето.
Кога била пронајдена, жената била свесна. Припадниците на крајбрежната стража од спасувачкиот брод што ја презел ѝ укажале прва помош, по што била пренесена до пристаништето Катаколо, на западниот дел од Пелопонез.
Оттаму, таа била транспортирана во болница во блискиот град Пиргос, каде што требало да остане под медицинско набљудување и да ѝ бидат извршени потребните прегледи.
Властите биле известени рано во петокот дека патничката паднала во морето од крузер што пловел под знамето на Бахамите. Во моментот на пријавувањето, бродот се наоѓал на околу 72 наутички милји југозападно од Закинтос.
Веднаш била организирана обемна потрага по исчезнатата жена. Во акцијата учествувале два брода на крајбрежната стража, хеликоптер на грчките воздухопловни сили, како и трговски бродови што се движеле низ поширокото подрачје.
По повеќечасовното пребарување на морската површина, жената била пронајдена жива, благодарение на забележаното светло од нејзиниот спасувачки појас.
