Околу 19.000 домаќинства во североисточниот дел на Словенија останаа без електрична енергија поради дефекти на енергетската мрежа предизвикани од обилните снежни врнежи што започнаа вчера.
Според РТВ Словенија, екипи од целата земја се на терен за да ги решат проблемите со снабдувањето со електрична енергија.
Словенечкиот премиер Роберт Голоб денеска се очекува да го посети Марибор и да се сретне со претставници на компанијата Електро Марибор и цивилната заштита за да ја оцени ситуацијата на терен.
Вчерашните снежни врнежи предизвикаа прекини на струјата за околу 40.000 домаќинства снабдувани од Електро Марибор и околу 8.000 домаќинства снабдувани од Електро Целје. Се очекува сегашните 19.000 домаќинства без електрична енергија да останат без струја и во наредните денови.
Службениците од цивилната заштита соопштија дека, поради неизвесноста околу нормализирањето на снабдувањето со електрична енергија, се подготвени генератори за итни случаи. Граѓаните се повикуваат да побараат привремено сместување кај роднини или пријатели додека трае прекинот.
