Видео од ајкула забележана во близина на црногорскиот брег предизвика големо внимание на социјалните мрежи и меѓу туристите. На снимката се гледа голем морски предатор кој плива во Јадранското Море, а многумина веднаш претпоставија дека станува збор за голема бела ајкула.
Сепак, експертите сметаат дека, иако на прв поглед наликува на голема бела ајкула, најверојатно станува збор за друг вид. Според нив, од достапната снимка не може со сигурност да се утврди точниот вид, но нема доволно докази дека се работи за голема бела ајкула.
Морските биолози потсетуваат дека појавата на ајкули во Јадранското Море не е невообичаена. Повеќето видови не претставуваат опасност за луѓето, а средбите со големата бела ајкула се исклучително ретки.
Експертите апелираат јавноста да не создава непотребна паника и нагласуваат дека ваквите снимки треба да ги анализираат стручни лица, бидејќи идентификацијата на видот само врз основа на видео може да биде погрешна.
