Претседателот на Србија, Александар Вучиќ, најави нова распределба на туристички ваучери за одмор во земјата, со цел да се поттикне домашниот туризам и да им се помогне на пензионерите.
Според најавата, ќе бидат доделени 30.000 ваучери во вредност од по 10.000 динари. Право на користење ќе имаат сите пензионери чии месечни примања не надминуваат 80.000 динари.
Вучиќ истакна дека овојпат ќе бидат воведени построги механизми за распределба, со цел да се спречат злоупотребите што, според него, се случувале во претходните циклуси.
Ваучерите ќе се распределуваат преку Пошта на Србија, а целиот процес ќе биде под засилена контрола на надлежните институции. Според најавите, во контролата ќе биде вклучена и Безбедносно-информативната агенција (БИА), за да се обезбеди ваучерите да стигнат исклучиво до граѓаните кои ги исполнуваат условите.
Со оваа мерка, властите очекуваат да им овозможат на илјадници пензионери полесно да си дозволат одмор во туристичките центри низ Србија.
