Снимки од безбедносните камери во Кантоналната болница во Зеница отворија сериозни сомнежи за физичко насилство врз 24-годишен пациент од Бугојно, кој бил сместен на Одделението за психијатрија. Случајот веќе го истражуваат полицијата и надлежното обвинителство, а петмина вработени во здравствената установа се уапсени.
Видеоматеријалот, кој го објави порталот „Зеницаблог“, прикажува дел од постапувањето на болничкиот персонал кон пациентот во неколку критични моменти. Снимките отворија прашања за начинот на кој медицинските техничари постапувале, почитувањето на медицинските процедури и евентуалната прекумерна употреба на сила.
За случајот до надлежните институции првично известиле управата и раководството на болницата, по што биле преземени истражни дејствија.
Снимките ги довеле во прашање тврдењата на техничарите
Според информациите објавени од „Зеницаблог“, болничките техничари првично тврделе дека пациентот ги нападнал. Но, по прегледувањето на снимките од надзорните камери и утврдувањето на дополнителните околности, нивната верзија на настанот била доведена во прашање.
Објавениот материјал опфаќа околу десет минути видеоснимки на кои се гледа постапувањето кон пациентот во неколку ситуации.
Полицијата и Обвинителството го презеле комплетниот материјал од камерите на спорното одделение, со цел детално да се реконструираат настаните и да се утврди дали има одговорност кај вклучените лица.
Уапсени петмина медицински техничари
Во рамките на истрагата биле уапсени петмина вработени во Кантоналната болница во Зеница. Станува збор за Б. М. (35), Х. В. (34), К. Л. (24), С. С. (37) и М. Д. (36), кои работеле како болнички техничари.
Од раководството на болницата соопштиле дека веднаш по дознавањето за настанот биле преземени законски и институционални мерки за утврдување на сите околности.
Од установата нагласиле дека имаат нулта толеранција кон насилството, непрофесионалното однесување и кршењето на основните принципи на медицинската етика.
Покрај индивидуалната одговорност на осомничените, истрагата треба да утврди и дали имало пропусти во надзорот над нивната работа, како и дали надлежните реагирале навремено и соодветно.
Според информациите на „Зеницаблог“, во текот на денот се очекувала одлука на Кантоналното обвинителство на Зеничко-добојскиот кантон за поднесување предлог за одредување притвор за петтемина осомничени.
Случајот потсетува на трагедијата со Кристијан Јосип Периш
Во текстот се потсетува и на случајот со младиот спортист Кристијан Јосип Периш, кој почина во психијатриска болница во Загреб, откако примил терапија и бил физички ограничен со ремени.
По неговата смрт, семејството изнесе дополнителни тешки обвинувања и детали за трагедијата. Меѓу нив беше и тврдењето дека неговата свршеница ја изгубила бременоста неколку дена по неговата смрт.
Случајот во Зеница и понатаму е предмет на истрага, а конечните околности и евентуалната одговорност на осомничените треба да бидат утврдени од надлежните институции.
