Компанијата Лидл објави повлекување од пазарот на производот „органски замрзнати јагоди 300g“ поради можен здравствен ризик.
Според официјалното соопштение, повлекувањето се однесува на серија со рок на употреба до 18.08.2027 година, која била достапна во продажба во претходни промотивни периоди. Иако производот веќе не е активен во продажба, потрошувачите кои евентуално го имаат во своите замрзнувачи се повикуваат да го вратат во продавница.
Причината за оваа мерка е сомнеж за можно присуство на норовирус, откриен при контрола на квалитетот. Според информациите, консумирањето на производот од оваа серија може да предизвика стомачни тегоби слични на вирусна инфекција, но без долгорочни последици по здравјето.
Компанијата информира дека купувачите ќе добијат поврат на средства и без приложена сметка, со цел процесот да биде полесен и побрз. Мерката важи исклучиво за наведената серија на замрзнати јагоди и не се однесува на други производи.
Од компанијата изразија извинување за непријатноста и нагласија дека безбедноста на потрошувачите останува приоритет.
