Стравична авионска несреќа ја потресе сојузната држава Кентаки, каде што товарен авион на компанијата „UPS“ се урна во индустриска зона на периферијата на градот Луисвил, предизвикувајќи огромна експлозија и пожар. Според најновите информации, загинале најмалку седум лица, а повеќемина се повредени, додека двајца работници сè уште се водат како исчезнати.
На социјалните мрежи се појави видео снимка од моментот на несреќата, која го прикажува како авионот McDonnell Douglas MD-11 нагло губи висина, паѓа зад објектите во индустриската зона и во следниот момент се претвора во огнена топка. Камерите од безбедносните системи го сниле страшниот пад, по што облак од пламен и густ црн чад ја прекрил целата област.
Гувернерот на Кентаки, Енди Бешир, потврди дека ситуацијата е крајно сериозна и дека тимовите за итни интервенции работат без прекин:„Сè уште има исчезнати лица, а пожарот е под контрола само делумно. Тимовите прават сè што можат за да го ограничат огнот и да ги пронајдат преживеаните,“ изјави тој на прес-конференција.
Според податоците на Федералната управа за авијација (ФАА), авионот полетал од аеродромот „Мухамед Али“ во Луисвил околу 17:15 часот по локално време, со крајна дестинација Хонолулу (Хаваи). Само неколку минути по полетувањето, авионот изгубил контрола и се урнал во зона со фабрики за рециклирање и производство на автомобилски делови, предизвикувајќи експлозии и сериозни оштетувања на околните објекти.
Компанијата „UPS“ соопшти дека во авионот имало тројца членови на екипажот, но не потврди дали тие се меѓу загинатите. Поради трагедијата, компанијата ги прекина сите ноќни операции во нивниот најголем логистички центар „Worldport“ во Луисвил.
Областа е ставена под наредба за засолнување, а аеродромот во Луисвил е затворен, со сите летови кон и од градот привремено суспендирани. Причините за падот засега не се познати, но ФАА и Националниот одбор за безбедност во транспортот (NTSB) веќе започнаа со истрага за оваа трагедија што ја потресе цела Америка.
