Кина го пушти во употреба најдолгиот автопатски тунел во Азија, долг 22,13 километри, кој минува низ планините во покраината Гуиџоу. Тунелот „Тјаншан Шенгли“, со модерно осветлување и бетонска конструкција, веќе се смета за едно од најзначајните инженерски остварувања во регионот.
Овој проект не поставува само нов рекорд, туку и решава долгогодишен проблем со тешко проодните и небезбедни планински патишта. Благодарение на новата делница, патувањата што порано траеле со часови по кривулести и ризични патишта, сега ќе бидат значително пократки и побезбедни.
Еден од инженерите вклучени во изградбата ја спореди работата со „операција на отворено срце на планина што постојано се движи“, нагласувајќи ги сложените геолошки услови и ризиците при пробивањето низ нестабилниот терен.
Тунелот е дел од пошироката стратегија на Кина за подобро поврзување на оддалечените области преку развој на модерна автопатска мрежа. Со години државата систематски ја проширува инфраструктурата, создавајќи разгранета мрежа што овозможува побрза и посигурна комуникација меѓу градовите.
Иако станува збор за најдолгиот тунел во Азија, светскиот рекорд и понатаму му припаѓа на норвешкиот тунел Лердал, долг 24,5 километри.
Со вакви проекти, Кина сè повеќе ги надминува природните пречки како планини и долини, користејќи ја инфраструктурата како клучен двигател на економскиот развој и своето глобално влијание.
