Мирен летен ден на аргентинската обала за миг се претвори во кошмар. Морето ненадејно се повлекло, оставајќи ги капачите збунети, а само неколку моменти подоцна се вратило со разорна сила, проголтувајќи сè пред себе. Сцените на паника и бегство се забележани на видеа што брзо се проширија на социјалните мрежи.
Трагедијата се случила во крајбрежниот град Санта Клара дел Мар, каде редок и исклучително опасен феномен — метеоцунами — удрил без никакво предупредување. Според првичните информации, едно лице го загубило животот, а најмалку 35 луѓе се повредени.
Жртвата е 29-годишен маж кој бил на одмор со својата партнерка. Тој се наоѓал во близина на лагуната Мар Чикита кога силен бран го повлекол во морето. Се сомнева дека при тоа удрил во карпи, ја изгубил свеста и се удавил.
Очевидци раскажуваат за хаотични сцени: чадори, торби и лежалки летале низ воздухот, додека луѓето си помагале меѓусебно за да не бидат однесени од водата. Еден маж доживеал срцев удар поради шокот.
Иако главниот удар не е целосно снимен, сведоци тврдат дека брановите достигнале и до девет метри висина. Спасувачите зборуваат за „црн вртлог“ каков што никогаш претходно не виделе.
Властите потврдуваат дека станува збор за метеоцунами — појава предизвикана од нагли промени на атмосферскиот притисок, а не од земјотрес. Најавуваат дека феноменот е тешко предвидлив и предупредуваат на зголемена претпазливост.
