Украинскиот министер за одбрана Рустем Умеров испрати алармантна порака по средбата со американскиот генерален изасланик Кит Келог – според украинските проценки, Русија се подготвува за поширок воен конфликт, кој би можел да вклучи и директна закана кон НАТО.
Во Киев, двете страни разговарале за стратегии за постигнување одржлив и праведен мир, со посебен фокус на одбранбената соработка, локализацијата на производство на оружје во Украина и Европа, и долгорочната безбедност преку развивање на воената индустрија.
Умеров ја нагласи важноста на американската поддршка, која, како што рече, буквално спасува животи и го приближува крајот на војната. Според него, неколку проекти за заедничко производство на вооружување веќе се во тек, а се очекува да бидат проширени и со учество на европски партнери и финансирање преку замрзнатите руски средства.
Заменик-министерот Сергиј Боев истакна дека Украина е подготвена за долгорочен мир, но тој мора да биде гарантиран со воена сила и технолошка супериорност. Украина располага со непроценливо борбено искуство, особено во употребата на дронови, и е спремна да го сподели тоа знаење со сојузниците.
Во разговорите со американските претставници било истакнато дека рускиот енергетски сектор мора системски да се ограничува, бидејќи претставува главен извор на средства за финансирање на инвазијата.
Она што најмногу го привлече вниманието е проценката дека Кремљ не се подготвува само за продолжување на војната во Украина, туку планира и сценарија што можат да ја загрозат стабилноста на НАТО и цела Европа.
Во овој контекст, САД најавија нова пратка на напредна воена опрема за Украина, вклучувајќи системи како „Патриот“, но и офанзивно оружје со далекусежни ракети, со кои – како што се шпекулира – ќе може да се гаѓаат цели дури и во Москва.
Оваа пресвртница доаѓа во критичен момент за Европа и светот, отворајќи прашања не само за иднината на Украина, туку и за подготвеноста на НАТО и ЕУ да се соочат со можно ширење на конфликтот.
