Украина соопшти дека интернет-системот Starlink, кој руските сили масовно го користеле на бојното поле, е оневозможен, што, според украински претставници, предизвикало сериозен колапс во комуникацијата и командувањето на руската армија.
Според официјални информации, руските единици користеле илјадници Starlink терминали за брза и тешко пресретлива комуникација, што им давало тактичка предност. По најновите дејствија, голем дел од тие врски се прекинати, а точниот обем на блокирањето засега не е целосно потврден.
Украинските власти открија дека во соработка со компанијата SpaceX се спроведува процес на верификација, со кој се издвојуваат легитимните украински терминали. Само уредите ставени на таканаречена „бела листа“ продолжуваат да функционираат, додека останатите – поврзани со руските сили – се деактивирани.
Министерот за одбрана Михаило Федоров преку социјалните мрежи порача дека проверките се во тек и дека веќе има видливи резултати на терен. SpaceX официјално не даде изјава, но Илон Маск претходно наведе дека мерките против неовластеното користење на Starlink од страна на Русија дале ефект.
Украински воени извори тврдат дека последиците се драматични – командните структури се нарушени, а офанзивните операции во повеќе региони се целосно запрени. Дополнително, украинската армија соопшти дека пронашла Starlink терминали монтирани на руски дронови со долг дострел.
Според информации од источниот фронт, речиси сите сателитски конекции што ги користеле руските сили се прекинати, што создава сериозни проблеми во нивното координирање и дејствување.
